12 Caado oo Kaa Dhigi Kara Qof Caafimaadkiisu Sareeyo

 

Caafimaadka wanaagsan ma aha nasiib keliya, balse waa natiijada caadooyin wanaagsan oo si joogto ah loo sameeyo, isbedel yar oo aad maanta bilowdo ayaa mustaqbalka kuu horseedi kara nolol caafimaad badan iyo jir xoogan.

12 ka caadooyin ee muhiimka ah waxaa kamid ah:

1. Cun quraac caafimaad leh 

Quraacdu waxay jirka siisaa tamarta uu maalinta ku bilaabmo, dadka quraacda cuna waxay inta badan leeyihiin feejignaan wanaagsan, waxayna ka yaraan kartaa inay si xad dhaaf ah wax u cunaan maalinta inteeda kale.

2. Qorshee cuntadaada

Hore u sii qorshaynta cuntada waxay kaa caawisaa inaad doorato cuntooyin caafimaad leh, isla markaana aad iska ilaaliso cuntooyinka degdegga ah ee aan nafaqada badan lahayn.

3. Biyo badan cab

Biyaha ayaa muhiim u ah shaqada jirka oo dhan, cabida biyo ku filan maalintii ilaa 3littre oo biyo ah wuxuu ka caawisaa jirka inuu si fiican u shaqeeyo, wuxuuna yareyn karaa ku tiirsanaanta cabitaanada sonkorta leh iyo kuwa lasoo warshadeeyo.

4. Samee jimicsi maalin kasta

Uma baahnid jimicsi adag, xitaa socod 30 daqiiqo ah ama dhaqdhaqaaq fudud maalin kasta aad aameyso ayaa kor u qaadaa caafimaadka wadnaha, murqaha iyo maskaxda.

5. Yaree waqtiga aad shaashadaha ku qaadato

Isticmaalka badan ee taleefanka ama kombiyuutarka wuxuu saameyn ku yeelan karaa hurdada iyo caafimaadka maskaxda, waqti u qoondee inaad ka nasato qalabyada elektarooniga ah.

6. Wax cusub baro

Barashada xirfad cusub, luqad cusub ama waxyaabo cusub waxay firfircooni siisaa maskaxda waxayna kor u qaaddaa awooda xusuusta.

7. Ka fogow sigaarka

Sigaarku wuxuu dhaawac u geystaa sambabada, wadnaha iyo xubno kale oo badan, Joojintiisu waa mid ka mid ah talaabooyinka ugu muhiimsan ee lagu ilaalin karo caafimaadka.

8. Hurdo kugu filan seexo

Dadka waaweyn badankood waxay u baahan yihiin 7 ilaa 9 saacadood oo hurdo ah habeenkii, hurdo wanaagsan waxay hagaajisaa xusuusta, niyadda iyo difaaca jirka.

Halkan ka aqriso➡️ hagaajinta tayada hurdada

9. Xooji murqahaaga

Jimicsiyada murqaha dhisa sida riixista (push ups), qaadista miisaanka ama jimicsiyada kaleba waxay xoojiyaan murqaha iyo lafaha jirka.

10. Banaanka waqti ku qaado

Qorraxda subaxdii ama galabtii iyo socodka meelaha dabiiciga ah ee aan wax saxmad ah ka jirin waxay kor u qaadaan fitamiin D-ga, waxayna wanaajiyaan maskaxda iyo caafimaadka guud.

11. Hagaaji isku dheelitirka jirka

Jimicsiyada isku dheelitirka sida yoga ama tai chi, ama xitaa socodka joogtada ah, waxay yareeyaan khatarta xanuuno jirkaaga soo weerari lahaa hadii aadan sameyn isku dheelitirnaan jireed, waxayna kordhiyaan awoodda jirka

12. Isdeji oo maskaxda nasii

Cadaadiska badan ee maskaxeed wuxuu dhaawici karaa caafimaadka, qaado waqti aad ku neefsato si qoto dheer, u ducaysato, u fikirto ama u nasato. Tani waxay kaa caawin kartaa dhimista walwalka maskaxeed iyo hagaajinta niyadda.

Gunaanad

Caafimaadka wanaagsan laguma gaaro hal maalin, balse waxaa lagu dhisaa caadooyin wanaagsan oo maalin kasta la sameeyo. Haddii aad bilowdo xitaa hal ama laba caado maanta, waxaad si tartiib ah u dhisaysaa nolol caafimaad badan oo mustaqbalka faa'iido kuu leh.

Xasuusin Muhiim ah:

Qodobadani waa talooyin guud oo kor u qaada caafimaadka. Haddii aad qabto xanuun gaar ah ama aad qorshaynayso isbeddel weyn oo ku saabsan cuntada ama jimicsiga, la tasho xirfadle caafimaad.